சுவாரஸ்யமாய் ஒரு விருது!

செந்தழல் ரவி ஆரம்பித்த சுவாரஸ்ய பதிவருக்கான விருதுத் தொடர் எனக்கும் ராப் அக்கா மூலம் கிடைத்துள்ளது. நன்றி ராப் அக்கா. இதன்மூலம் நானும் சுவாரஸ்யமான(!) பதிவர் என்பது மீண்டும் ஒரு முறை நிரூபணம் ஆகியுள்ளது. இதுக்கு முன்னே எப்பவாச்சு! அப்ப என்னவாச்சுன்னுல்லாம் கேக்கப்படாது?!

விருதுகள் கிடைக்கும் சந்தோசத்தை விட அதைப் பகிர்வதில் அதிக மகிழ்ச்சி கிடைப்பதில் முதல் காரணம் எனக்கு பிடித்த பதிவர்களிடமிருந்து பெறப்போகும் புதிய இடுகைகளும், அவர்களைக் கவர்ந்த பதிவர் பற்றிய குறிப்புகளும்.

அவ்வகையில் என் மனம் கவர்ந்த பதிவர்களில் சிலரை மாத்திரம்தான் இங்கு தேர்ந்தெடுக்க முடிவது சற்று வருத்தம் தந்தாலும் இவர்கள் மூலமும் சங்கிலித்தொடர் நீளும் என்று நம்புகிறேன்.

1. பாலபாரதி : செல்லமாய் தல. வலையுலகில் எனது முதல் நண்பர், அண்ணன், வழிகாட்டி எல்லாமுமாய் இருப்பவர். இவருக்குப் பிடித்தமான பதிவுகளைப்பற்றிய அறிமுகம் வேண்டியும், பதிவர்கள் பற்றி தெரிந்து கொள்ளவும் இவருக்கு இவ்விருதினை அளிக்கின்றேன். இவரது பதிவில் உடனுக்குடன் அத்தனை இடுகைகளையும் படித்து விட்டாலும் விடுபட்டவைகள் என்ற தொகுப்பில் கிடைக்கும் செய்திகளின் நேர்த்திக்கு நான் ரசிகன்.

2. இளவஞ்சி: எந்த விசயமா இருந்தாலும் படிக்குறவன் பொடனியில செல்லமா தட்டி கைப்பிடிச்சு கூட்டிட்டு போவணும்ங்கறா மாதிரி இவரோட பதிவுகள் இரண்டு வரி படித்துவிட்டு பத்தி தாண்டிவிட முடியாத ஒரு வசீகரிப்பு தன்மை கொண்டவை. செல்லமாய் வலையுலக வாத்தி. இப்ப அதிகம் எழுதறதில்லை. வேலைப்பளு அதிகம் அப்படின்னு சொன்னாலும், வாத்தி மறுபடியும் பழைய்ய உற்சாகத்தோட எழுத ஆரம்பிக்கணும். அதுக்கு இந்த விருது ஒரு தொடக்கப்புள்ளியா இருந்தா அதை விட சந்தோசம் வேற எதுவும் கிடையாது எனக்கு. இவரது க.க. தொடர் படித்ததுண்டா!? ரங்கமணிகளாய் ப்ரமோசன் வாங்குவது எப்படி என்று விளக்கிச் சொல்லியிருப்பார். இந்த சமயங்களில்

3. அய்யனார்: இவரது எழுத்துக்களை விமர்சிக்க, ஆராதிக்க ஒரு கூட்டம் இருக்கிறது. வன்மமும் குரூரமும் சோகமும் குதூகுலமும் எதுவாயினும் அந்த சூழலை நமக்குள் கொண்டுவந்து நம்மை மிரளச்செய்யும் எழுத்துக்குச் சொந்தக்காரர். இவரது குறிப்பிடத்தகுந்த நண்பர்களின் பதிவுகளை நிச்சயம் அறிமுகப்படுத்த வேண்டும் என்று எதிர்பார்ப்பில் இன்னுமொரு ரசிகன். இவரது உரையாடலினி இடுகை மீண்டும் தொடர்வாரா என்ற எதிர்பார்ப்பு எங்களிடம் உண்டு. உங்களை சுவாரஸ்யப்படுத்தும் எழுத்துக்களை எங்களுடன் பகிருங்கள் அய்யனார்.

4. வா. மணிகண்டன்: இலக்கியவாதி. வார்த்தைகளுடன் ரசனையையும் கோர்ப்பதில் வித்தகர். கவிதைப்பித்தர். நல்ல கவிதைகளை தேடித்தேடி படிப்பதும், எழுதுவதுமாக பதிவினை கொண்டு செல்பவர். சமூகக்கட்டுரை எழுதுவதிலும் வித்தகர். இவர் வாசிக்கும் சுவாரஸ்ய பதிவுகளை அறிந்து கொள்ள இது ஒரு வாய்ப்பாக அமைகிறது எனக்கு.

5. கே. ரவிஷங்கர்: கவிதை, கதை, ஹைக்கூ என்ற பலபடி பரிணாமங்கள் கொண்ட பதிவு கொண்டாலும் இவரது விமர்சனங்கள் பலராலும் விரும்பப்படுபவை. கிளிஷேத்தனங்களை கிழித்து விட்டு விமர்சிப்பது எனக்கு பிடித்திருந்தது. விமர்சனங்களில் சுட்டிக்காட்டும் குறிப்புகள் நிச்சயம் எனக்கு உபயோகமாய் இருக்கிறது. ஹைக்கூவிற்கு எழுதிய கட்டுரை போன்று கவிதைக்கும் காட்சிப்பொருள் அமைப்பதற்கும் ஒரு கட்டுரை எழுதினால் பயன் தரும்.

6. சங்கா: புதியவர். மோட்டு வளையை பார்த்து கிடைக்கும் மொக்கைகளை தொகுத்து ஏற்றுபவர். சுவாரஸ்யம் குன்றாமல் கதையையும் அனுபவங்களையும் கோர்த்து தருபவர். இவரது இசை விருப்பப்பாடல்கள் நல்ல தேர்வு. ரெகுலர் கஸ்டமர் என்ற பெயரில் என்னையும் ஜெகனாதனையும் விடாமல் துரத்தி துரத்தி அடித்துக்கொண்டிருப்பவர். பல பதிவுகளை தேடித்தேடி படித்து பின்னூட்டும் இனிய நண்பர்.